Бібліятэка прыняла ўдзел у першым Міжнародным свяце паэзіі “О, навагрудскі край – мой родны дом…”, прысвечаным 220-годдзю з дня нараджэння Адама Міцкевіча. На навукова-практычнай канферэнцыі “Адам Міцкевіч – талент, непадуладны часу” увазе гісторыкаў, філолагаў, супрацоўнікаў музеяў і іншых спецыялістаў прапаноўваліся матэрыялы з фондаў бібліятэкі, звязаныя з рознымі аспектамі міцкевічазнаўства і папулярызацыяй творчасці Адама Міцкевіча.
6 кастрычніка цэлы дзень працавала інтэрактыўная пляцоўка “Малая радзіма вялікага паэта”. Цудоўная кніжная экспазіцыя, гульня з вызначэннем твораў Адама Міцкевіча, партрэт-пазл класіка літаратуры. Асаблівую ўвагу гараджан і гасцей горада прыцягнуў вобраз “Свіцязянкі”, гераіні твораў Адама Міцкевіча. Яе прадстаўляла аўтар і дыпламант абласнога конкурсу самаробнай лялькі “Героі кніжных старонак” Ларыса Касцюк, загадчык гарадской бібліятэкі.
На бібліятэчнай пляцоўцы госці горада і чытачы змаглі непасрэдна пазнаёміцца з кнігамі і пагутарыць з пісьменнікам Юрыем Татарынавам, аўтарам новага выдання “Пять дорог из Новогрудка”.
Літаратурна-музычная пляцоўка “Чытае дружна Мінск і Навагрудак мае творы…” на Кургане Бессмяротнасці дала цудоўную магчымасць пачуць паэтычныя радкі ў музычным суправаджэнні і вершы-прысвячэнні паэту ў выкананні Галіны Ліс, Аляксандра Абадзінаскага , навучэнцаў Навагрудскага гандлёва-эканамічнага каледжа і чытачоў бібліятэкі.